返回列表 回復 發帖

[新聞] 皇馬加碼14億轉會費—曼聯心動了

皇馬日前國冠盃3:7慘敗畀同市死敵馬體會,令球迷嘩然,更加驚動「銀河艦隊」高層,終於令會長皮里茲下定決心,要收購曼聯中場保羅普巴救亡,準備加碼至1.5億鎊(約14億港元),滿足紅魔鬼要求。

根據西班牙《阿斯報》爆料,以皮里茲為首嘅皇馬高層,睇完呢場大敗後,大受刺激,緊急開董事會討論組軍策略,以免新一季開壞個頭,打擊爭標機會。據悉,各位高層都認為,只有收購普巴,先至有機會扭轉目前劣勢。

特別係皇馬現時傷兵滿營,巴謙戴亞斯、馬高阿辛斯奧、費蘭特文迪、盧卡祖域都加入「十字軍」,更加需要簽入普巴呢種級數嘅球星壓場。因此,皇馬董事會基本上已同意加碼,由原本只願用1億鎊轉會費買普巴,增加至1.5億鎊。

加里夫巴利離隊在即,可以騰出60萬鎊周薪人工空間,相信可以滿足普巴待遇要求,依家只等待曼聯回覆,睇來呢單英超史上最大買賣,好大機會成事。
返回列表