返回列表 回復 發帖

[新聞] 車仔最快5‧12封王

隨著熱刺不敵韋斯咸,英超爭霸局面忽視明朗,車路士只需要再贏兩場就封王,條數就係咁簡單。

本來大家都對熱刺滿有期望,結果嚟到呢場倫敦打吡,幾次機會都未能撕破對方防線,去到關鍵時刻就失諸交臂,冇啦,普捷天奴賽後把口幾歹都話未絕望,不過都承認困難。睇理球員賽後個個垂頭喪氣,身體語言勝過一切。

係好困難,如果車仔之後賽程難打都仲有一線生機,可惜唔係。輸波後熱刺仍然比少賽1場嘅車仔4分,只要車仔下星期一主場砌低米杜士堡,然後再喺星期五(5月12號)贏埋西布朗,咁就懶理熱刺之後戰果,即時封王,所以叫大家,尤其係行家認住5‧12呢個日子,嗰日有排忙。

換句話講,當熱刺下一次再落場,即係再下個星期日(5月14號)主場鬥曼聯嘅時候,可能一切已經塵埃落定……,如果之前車仔兩場波贏唔晒,熱刺到呢場失分一樣造就車仔提早封王,感覺上,唔係5‧12可能就係5‧14。點都好,希望到時熱刺鬥曼聯場波,雙方都唔好完全放軟手腳,整場好波畀大家嘆。

車熱兩軍餘下賽序

車路士
08/05        主VS米杜士堡
12/05        客VS西布朗
15/05        主VS屈福特
21/05        主VS新特蘭

熱刺
14/05        主VS曼聯
18/05        客VS李斯特城
21/05        客VS侯城
返回列表