返回列表 回復 發帖

[新聞] 曼聯難抗祖記超筍組合 戴巴拿入硬魔!

用盧卡古一個,去換保羅戴巴拿+文迪蘇傑+1000萬鎊,畀你係蘇斯克查賣唔賣?比利時前鋒盧卡古,一直被認定將轉會國際米蘭,但祖雲達斯新帥沙利亦對佢有興趣,英媒透露祖記已向紅魔鬼提出超筍Package,當中包括以阿根廷天才前鋒戴巴拿作收購條件,現時戴巴拿經理人已飛去倫敦同曼聯代表會面。今年25歲嘅戴巴拿可翼可鋒仲可打10號位,把握力創造力比盧卡古有過之而無不及,如果成功轉會,魔迷肯定開心到震!

戴巴拿係祖雲達斯10號波衫擁有人,自由巴勒莫轉投「斑馬兵團」後,一直係祖記前線領軍人物。但上個夏天C朗高調加盟後,戴巴拿重要性、出場機會減少;沙利成祖記新帥後,更希望購入盧卡古,故決定用戴巴拿、克羅地亞前鋒文迪蘇傑再另加1000萬鎊收購。英媒報道戴巴拿其實係較想留於祖雲達斯,但如沙利將佢出場時間進一步削減,而曼聯亦畀到高人工的話,相信佢唔介意入魔。據悉其經理人已飛抵倫敦同曼聯代表展開談判。

曼聯剛於挪威踢熱身賽,領隊蘇斯克查被記者問起戴巴拿,蘇帥咁樣回應:「戴巴拿依然係祖雲達斯球員,我唔會單獨評論。但曼聯對好球員當然有興趣,我亦希望於轉會窗關閉之前,可以多簽1、2個新面孔。」蘇斯克查冇否認對戴巴拿有興趣,相信呢名阿根廷好波之人大有可能加盟。
返回列表