鶴臣「活得比你好」，不但前晚帶領西布朗反勝「前主」利物浦，早前仲獲得730萬鎊（約9,100萬港元）巨額賠償！英國《每日郵報》為鶴臣埋單計數，佢執教紅軍僅192日就狂賺880萬鎊，日薪高達45,833鎊（約57萬港元），仲賺得多過朗尼！

利物浦今季初請鶴臣執教，但半年後就將佢炒魷，唔少英超同行都戥鶴臣唔抵，但呢位老帥其實已於紅軍身上攞番夠有突。前晚英超西布朗先輸一球下，憑兩個十二碼反勝利物浦，鶴臣見賽果當然滿意，再諗諗荷包腫脹，更加一面得戚。《每日郵報》報道，早前利物浦已賠番730萬鎊畀前帥，再加埋半年150萬鎊人工，鶴臣撈半年已賺過億港元，如果計番日薪，更幾乎賺60萬港元一日，呢啲工去邊度搵吖？

至於利物浦又輸一場，來季歐洲夢進一步受到打擊，加上隊長謝拉特鼠蹊傷勢唔輕，有可能因此提早收咧，更令利迷心情跌至谷底。