當晚利物浦球迷係晏菲路既澎湃氣氛絕對可以比美近年紅軍係歐聯既賽事﹐例如2004/2005年對奧林比亞高斯﹐祖雲達斯﹐車路士等﹐甚至有過之而無不及。
當時首回合﹐紅軍作客以0-1輸比聖伊天﹐所以次回合紅軍係晏菲路係不容有失。係當日朝早﹐晏菲路球場外面就已經有大批球迷聚集﹐直到下午﹐D球迷紛紛提早放工放學黎到球場外面﹐氣氛已經開始蔓延到眾球員心裡面。
係開波之後一分鐘﹐奇雲基瑾(Kevin Keegan)就替紅軍入第一球﹐總比數終於追平1-1﹐球迷歡呼聲從未停過。
紅軍未能突破聖伊天有效既越位陷阱﹐半場維持總比數1-1。但係下半場開波後六分鐘就被聖伊天追平1-1﹐總比數落後1-2兼輸埋作客入球。而家輪到在場既5000位法國球迷開始歡呼。
利物浦而家開始要打逆境波﹐因為要入多至少兩球方可晉級。
領隊皮士利(Bob Paisley)係聖伊天入波後第一個動作就係就有「超級後備」(Supersub)之稱既花哥夫(David Fairclough)開始熱身。(當時只比換一個後備﹐而花哥夫又頻頻係後備入替後為紅軍贏得無數關鍵勝利﹐發揮到「超級後備」呢個功能﹐故得此名。)
紅軍係主場球迷不斷支持下﹐終於係59分鐘雷堅尼地(Ray Kennedy)再度為利物浦領先。比數而家2-1﹐但兩回合計2-2仍然輸作客入球﹐紅軍仍需入多一球。
晏菲路既球迷開始發揮佢地無懈可擊既功能﹐將氣氛發揮到頂點。
紅軍門將基文斯(Ray Clemence)
「當晚氣氛可以用難以置信黎形容。完全冇人係坐低睇波既﹐有D球迷甚至係企係座位上。個晚既氣氛係我一生中感受到最奇妙既。當時球場內大約有五萬人﹐但聽起黎就覺得好似有二十五萬。」(注﹕當時英國球場未有硬性設座位同入場限制﹐容量有時可以去到超過五萬。)
73分鐘﹐皮士利終於將杜錫克(John Toshack)換走﹐花哥夫入替。
86分鐘﹐總比數仍然為2-2﹐當最樂觀既利物浦球迷都認為要再等多一年先可以染指歐冠盃時﹐雷堅尼地突然由中場將球笠到聖伊天後防後面。係全場大聲喝彩既同時﹐花哥夫已經扭過對方守衛。而當佢成功控球在腳時﹐全場球迷都屏住呼吸。然後﹐花哥夫輕鬆地將球射過對手門將入網。
晏菲路球場既球迷即時史無前例地大聲狂呼﹐當晚有幸在場既球迷都發誓當時感覺到連地下都被狂呼聲震動。
最終﹐利物浦贏3-1﹐而總比數紅軍也反勝3-2晉級四強。此仗為後來五月係羅馬首次奪得歐冠盃﹐及往後係歐洲賽稱霸奠定基礎﹐花哥夫既貢獻係功不可沒﹐一生註定要掛住「超級後備」呢個稱號﹐成為利物浦歷史上既傳奇球員之一。
花哥夫﹕
「當我將球射出時球場仿彿鴉雀無聲﹐但當波射入網之後既噪音係難以置信。當時奇雲基瑾跳到我背脊上並同我講『超級後備﹐你又得左啦』。」 |
發表於 2007-10-22 01:45 PM
| 
