[新聞] 推米堡落深淵 6分甩開紅軍

tok

推米堡落深淵　6分甩開紅軍
曼聯住半隻盃耳
03/05/2009


曼聯又向聯賽冠軍邁進一步！尋晚英超早場紅魔鬼作客米杜士堡，雖然領隊費格遜為周中歐聯留力，收起C朗同雲達沙兩名主將，但對住「米堡」仍然游刃有餘，憑傑斯同朴智星上、下半場各入一粒淨勝二比○。曼聯領先次席利物浦六分，已住聯賽半邊盃耳。
費Sir匠心獨運，完美運用手上人腳，歐聯、聯賽兩邊戰線盡在掌握之中，睇見「米堡」病入膏肓，殺雞焉用牛刀，即時收起C朗同雲達沙，為周中歐聯次回合作客阿仙奴做好準備。上半場曼聯控制大局，傑斯廿五分鐘輕輕鬆鬆左腳建功，半場領先一粒。
下半場「米堡」仍然谷唔起，曼聯睇定食，朴智星左腳抽射入網拉開紀錄，兵不血刃齊三分，而米堡輸波後護級形勢更不樂觀。目前聯賽只餘四輪，紅魔鬼封王機會愈來愈大。另外，曼聯中堅里奧費迪南證實肋骨傷患無大礙，周中歐聯次回合賽事可上陣。


阿仙奴車路士齊報捷


其餘兩支周中要應付歐聯四強次回合比賽英超球隊阿仙奴及車路士，昨晚聯賽也雙雙報捷。阿仙奴為應付惡鬥曼聯的歐聯大戰，收起法比加斯、艾迪巴約、高路托尼、艾蒙尼亞等主力，但作客樸茨茅夫仍然綽綽有餘，前線擔大旗賓特拿脫胎換骨，上半場就獨建兩功，下半場由墨西哥新星卡路士韋拿「埋齋」，輕取對手三比○。
將與巴塞隆拿爭奪歐聯決賽資格車路士，就強陣出擊，領隊希丁克僅把波歷克一名主力先列後備，但仍憑安歷卡及馬隆達於開賽十分鐘內各入一球，再由杜奧巴於下半場建功，以三比一打敗富咸。

tok

車仔阿仙奴齊奏捷
曼聯攻陷米堡放甩6分
03/05/2009

曼聯再顯爭標霸氣，周六晚憑傑斯及朴智星各建一功，作客輕取護級分子米杜士堡二比○。全取勝利三分後，紅魔於英超積分榜以八十分續領群雄，放甩利物浦及車路士足足六分，冕之路又行近一大步！至於紅魔周中的歐聯對手阿仙奴，亦以三球大炒樸茨茅夫，兩隊齊齊以勝仗迎接歐聯。
為留力周中的歐聯大戰，費格遜昨仗收起雲達沙、C朗及卡域克等主將，改由賓科士打、朴智星及馬捷達等副選兵擔正，但表現依然較主隊米堡優勝。戰至二十五分鐘，出爐英格蘭球員先生傑斯於禁區頂妙射破網，為紅魔先開紀錄。

里奧費迪南周中可披甲

易邊後依然是紅魔天下，「星仔」接應傳送起左腳建功，助曼聯將比數擴大至二比○。搶分心切的米堡主帥修夫基，及後調入艾方素加強火力，可惜攻勢只屬隔靴搔癢，對紅魔大門毫無威脅。結果曼聯保住二比○勝果，清風送爽擊敗米堡，令後者的護級形勢更見危殆。
值得一提的是，里奧費迪南昨仗並無上陣，幸而經檢查後證實其肋骨並無出現骨折或裂痕，周中可於歐聯四強次回合披甲鬥阿仙奴，消息肯定令費爵爺及一眾紅魔球迷鬆一口氣。
同晚的阿仙奴贏得更輕鬆，領隊雲格收起大部分主將為周中歐聯留力，仍憑卡路士韋拿的入球加上賓特拿梅開二度，以三球大勝樸茅，穩入英超前四；至於強陣出擊的車路士亦以三比一擊敗富咸，暫落後榜首曼聯六分。

[ 本帖最後由 tok 於 2009-5-3 04:01 PM 編輯 ]