車路士有救喇！因為摩連奴同埋希汀克齊齊表態希望回歸，前者當年幫車路士一搔50年之癢重奪聯賽錦標，後者就以看守領隊身份短時間內捧咗隻足總盃返嚟，兩位仁兄都相當有料，是但一個回巢，車路士球迷都開心到震。
皇馬教練摩連奴日前喺倫敦出席一項球圈活動時，親口向記者證實佢下一站會重返英超，雖然佢冇大大聲講「車路士」3個字出嚟，但席間就一路話自己仲好懷念喺史丹福橋嘅時光，仲解釋當年教國米係想征服相當重視戰術運用嘅意甲，而教皇馬就係因為對方三顧草廬，搞到佢唔好意思再推；不過講到底，英超始終係最吸引佢嘅聯賽，對佢有種萬有引力！
阿仙奴唔吼施治先至上車
幾乎係同一時間，希汀克亦都發表咗回歸宣言，畢竟佢同「油王」老友鬼鬼，撞啱佢教土耳其國家隊又唔算太成功，難怪希汀克都放定風，話再幫唔到土耳其突破，寧願識趣解約，但下一個落腳點始終都係以車路士為首選。
講開車仔，佢哋件鋼門施治當年原來係接觸阿仙奴先，但自命係千里馬嘅雲格竟然覺得施治唔夠班，冇要到先輪到車仔，咁大家明白點解阿仙奴6年冇盃落袋，仲成日為門將頭痕啦！ |
發表於 2011-3-24 11:20 PM
| 