返回列表 回復 發帖

[新聞] 利物浦史上最豪 8.5億買迪比利

上屆歐聯冠軍利物浦今夏轉會市場比較靜,只係簽入2位「2000後」小將薛比雲丹貝治、夏菲艾利諾,後者更加未夠秣簽職業合約,令人懷疑紅軍新一季有冇足夠兵力同曼城爭奪英超。

英超轉會市場將於8月8日關閉,利物浦終於要出手,根據西班牙媒體《Don Balon》爆料,紅軍計劃以破球會轉會費紀錄嘅9000萬鎊(約8.5億港元)收購巴塞隆拿翼鋒奧士文尼迪比利,打破以7500萬鎊買華基爾雲迪積克嘅紀錄。

利物浦領隊高普一直想簽入翼鋒,以減輕穆罕默德沙拿、沙迪奧文尼嘅負擔,令球隊可以同時兼顧英超同歐聯雙線爭標,早前就有消息指利記想收購多蒙特新星查頓辛祖,但多蒙特冇咁易放人,而且曼聯都想買辛祖,呢位英格蘭國腳身價水漲船高,令紅軍難以得手。

反觀,巴塞隆拿有意出售奧士文尼迪比利,甚至打算將佢作為向巴黎聖日耳門回購尼馬嘅籌碼。

由於收購尼馬一事,遲遲未有進展,巴塞可能會考慮將奧士文尼迪比利賣畀利物浦,但係巴塞要求1.08億鎊轉會費,成為雙方交易最大障礙。
返回列表