[新聞] 英超10大被低估球星出爐

excaliburs

每次打開電視睇電視劇總係會見到一班叫唔出名嘅二、三線姐仔，不過佢哋絕對有存在價值，皆因主角都要綠葉扶持，唔通成套電視劇都係楊怡、楊怡，同埋楊怡咩！英國有足球雜誌就列出10大最被低估球員，雖然呢班球員好多都唔太起眼，但係佢哋絕對係球隊嘅無名英雄！
球迷唔多唔少都聽過《442》呢個大名，《442》就係英國稍為權威嘅足球雜誌；佢哋近期就為「奀星」平反，列出10大最被低估球員！呢班球員嘅身價大多平易近人，而且大多數都來至中小型班，大家又睇吓有冇合心水球員入圍？
排得到最被低估嘅球員首位，當然「暗」得嚟又有番咁上下實力啦！南韓右翼李青龍上季加盟保頓之後，季尾立即當選為球會嘅年度最佳球員兼最佳新援；其實亞洲人喺英超一向都唔太起眼，成為被「低估之首」絕對係意料中事！
至於其他入選球員就有奇雲杜里、洛達列加同埋艾法寧頓等等，呢班二、三線球員往往只係要幾百萬鎊就有交易，不過講到「交功課」就絕對拍得住班千幾二千萬鎊嘅球星！其實睇電視都未必吓吓要睇實楊怡，有時轉吓口味睇姚子羚都唔錯吖，下次睇波不妨留意吓呢班人啦！