[新聞] 生擒「裸跑」假波叔無端端領紅

乜嘢係好心着雷劈？只要睇吓非聯賽球隊道徹斯特嘅領隊兼球員艾殊利域卡斯就知 o架嘞！話說佢日前喺一場地區聯賽，幫手捉住扮成「波叔」入場搗亂嘅球迷，點知俾球證直接用紅牌趕出場，真係爆笑。
呢單嘢係喺禮拜一發生，場波係一場地區聯賽，由哈雲特主場對道徹斯特。戰至 70分鐘，兩隊仲係打成 1:1，突然有個以波叔打扮（Borat-style）嘅球迷衝落場「裸跑」，而喺呢一刻，兩隊球員同球證都唔知點做，惟有等在場保安同職員嚟處理，當佢哋束手無策，於身為領隊兼球員嘅艾殊利域卡斯就挺身而出，衝上前箍住呢個「假波叔」條頸，再將佢撳落地下，然後由職員將佢帶走。
前英甲兵自告奮勇

艾殊利域卡斯（左）多年前曾效力現處英甲的杜根咸。 Getty Images

當兩隊球員同球場球迷以為事件告一段落嘅時候，執法球證大衛史冰突然向艾殊利域卡斯出示紅牌，理由係指佢喺球場上有暴力行為。現年39歲、司職中堅嘅艾殊利域卡斯賽後就話：「我真係O晒嘴囉！我一心諗住捉住嗰條友，等我哋可以繼續比賽。最搞笑嘅係，班職員竟然非常感激我。」之後球證先生仲趕多兩個道徹斯特嘅球員出場，又命令喺邊場抗議嘅道徹斯特職員返埋位。最終道徹斯特喺 8個打 11個之下，輸咗 1:3。
假波叔：「佢唔打欖球嘥晒」事後個假波叔俾人起底，佢叫阿倫楊格，20歲，係哈雲特嘅粉絲。佢之所以咁做，緣於賽前喺間酒吧度同人打賭。呢個假波叔話：「我純粹係想搞吓氣氛。現場啲保安人員啲動作實在太慢嘞，不過艾殊利就唔同，佢身手好好。講真，佢唔打欖球真係嘥晒。」至於哈雲特波士沙恩加爾就咁話：「我對於艾殊利被趕出場感到遺憾，佢肯定好沮喪。」之前踢過彼德堡、杜根咸同埋韋茅夫等低組別球會嘅艾殊利域卡斯，雖然好心冇好報，但呢位喺錫菲聯青年軍出生嘅英格蘭球員，因呢單球迷「裸跑」事件而出晒名，都算係因禍得福。