[新聞] 日本國腳鬥日職明星籌款

HIDE

日本國腳鬥日職明星籌款
19/03/2011

受地震同核問題影響，冇其他國家球隊願意到東瀛比賽，日本國家隊對黑山同新西蘭嘅熱身賽被迫取消。尋日日本足協宣布安排國家隊同日職明星隊進行慈善賽，並去信要求歐洲球會放人，外流球員包括本田圭佑、長友佑都同內田篤人全部喺26人大軍名單，教頭沙哲朗尼亦會現身大阪長居球場領軍。

                          召12外流兵沙哲朗尼領軍

原本日本足協打算喺3月29日，安排國家隊喺大阪同新西蘭比賽，但對方擔心核問題拒絕派隊，日本足協會長小倉純二咁講：「代替嘅比賽係國家隊對日職明星隊，由於係慈善賽唔係國際A級賽事，我哋要去信各間歐洲球會，希望12個外流球員獲准返國。」地震發生後，日本教頭沙哲朗尼返咗祖家意大利，不過佢應承咗去大阪領軍出戰，至於原本日本U22喺東京對烏茲別克嘅熱身賽，就改喺烏茲別克進行。

                          

楢崎正剛街頭募捐

                          

仲有，阿仙奴領隊雲格承認，可能會放棄喺今個暑假到日本踢季前巡迴賽，到時或者會改為踢慈善賽為災民籌款。暫時確定嘅慈善賽已經有大阪飛腳對神戶勝利船、鳥棲砂岩對熊本羅亞素，其他球會亦有派球員籌款，又設立捐款箱，浦和紅鑽暫時籌到200萬日圓，鳥棲砂岩籌到100萬日圓左右，名古屋鯨魚隊長楢崎正剛仲親自進行街頭募捐，棒球明星鈴木一朗更透過經理人公司捐出1億日圓賑災。