冇歐聯踢？使乜驚呀！英超老牌勁旅利物浦行政總監伊恩艾利同紅軍贊助商渣打揸弗人基雲羅斯日前雙雙接受訪問，大爆球隊未來發展重心會係主攻亞洲市場，簽入亞洲球員，相比起英超爭取好成績，歐聯根本完全唔重要。本田圭佑、朴主永加盟再唔係天方夜譚，紅軍搵錢大過天，利迷聽見唔驚先出奇？
兩大巨頭談未來大計，身為紅軍行政總監嘅伊恩艾利認為球隊「食老本」冇有怕：「如果你投資利物浦，你唔係投資緊今個球季同依家班球員，你其實係投資落超過100年歷史嘅足球成就，一間英格蘭最成功球會。我哋係全球最多球迷嘅球會之一，我哋多年來嘅成功，令球迷至今依然深愛利物浦。」
歐聯半夜踢亞洲球迷瞓晒覺
伊恩艾利堅持放眼未來，佢仲話明球會大把「水源」，唔愁符合唔到歐洲足協嘅新財政條例，就連之前暫停咗嘅興建新球場大計都可能再次推行：「出售球場冠名權會為興建球場提供巨大經濟支援，找尋類似嘅贊助形式將係我哋下一個大計劃。」
查實伊恩艾利可以咁口響，無非都係因為09年佢哋得到銀行贊助商簽下一紙4年總值達8,000萬鎊（約10億港元）嘅贊助合約，贊助商嘅發展理念同伊恩艾利可謂夾到絕。渣打揸弗人基雲羅斯直言歐聯成績對佢哋嚟講完全唔重要：「大部分亞洲人喺歐聯比賽時間都瞓緊覺，佢哋只會朝早起身睇賽果同入球片段。如果利物浦想幫到我哋，一定係全力發展亞洲市場，你只要睇吓朴智星帶畀曼聯嘅幫助。未來10年，我哋一定要放眼亞洲，中國又好，南韓都好。」
陸軍簽卡蘭積卡預本田走人
贊助商開聲，紅軍點會唔識做？事實上，紅軍想注入亞洲血，之前就傳出過佢哋睇中日本國腳本田圭佑同南韓射手朴主永，其中有俄羅斯報章更踢爆莫斯科中央陸軍已經簽入熱刺克羅地亞中場卡蘭積卡，今年夏天就會正式成交，為放走本田圭佑做準備，紅軍靠亞洲兵挑戰英超冠軍，絕對指日可待。 | 
發表於 2011-4-6 09:30 PM
| 
