法比仔畀位韋舒亞上
13/12/2010
【本報綜合報道】今場榜首大戰，大家都好關心阿仙奴隊長法比加斯能否復出，其實法比仔已經喺上周五復操，但雲格尊重佢意見，故將「決定權」交番畀法比加斯，由佢自己決定落唔落場，不過據英國傳媒報道，法比仔有感自己仲未弗，好可能先任後備，由年僅十八歲嘅韋舒亞打正選。
剛傷愈做後備
法比加斯今季多次受傷，聯賽僅九次正選上陣，射入兩球，佢對上一次為阿仙奴披甲係上月廿四日歐聯作客布拉加，嗰場比賽阿仙奴唔單止輸波，法比仔仲勇戰受傷。
不過阿仙奴今季已經冇咁倚賴法比加斯，代替佢上陣嘅韋舒亞漸具大將之風，開始企穩正選位置。
阿仙奴領隊雲格表示：「以往我哋冇咗法比加斯，中場組織力即刻差咗，但今季韋舒亞成熟咗好多，可分擔法比加斯工作，佢哋嘅角色唔存在衝突，我認為兩人同時上陣效果甚佳，所以就算法比仔復出，韋舒亞都會繼續有機會披甲。」 | 
發表於 2010-12-13 05:52 PM
| 